السلام عليكم..
اليوم موضوعنا مختلف شوية .. يخص الأمهات او الخوات الي يحبو يهتمو
ب اخواتهم الصغار ، لمى كنت نفاس في بنتي جبت فلبينية تعرفون شغل النظافة وكذا لوول المهم قالت لي انو انتم السعوديات عندكم تصبغات لان امهاتكم من وانتم صغار مايهتمون بترطيب بشرتكم بنتك لازم كل يوم ترطبين بشرتها وقالت لي على خلطة هم يستخدمونها في الفلبين بس صراحة ما سويتها لبنتي مادري ليش بس حسيتها صغيرة على الشي هذا الخلطة عبارة عن كريم نيفيا الازرق القديم و بودرة جونسون تقولي اخلطيهم و كل يوم رطبيها فيها مادري حسيت ممكن تسبب تحسس لو خلطتها مع بعض وبشرتنا تختلف عن بشرتهم ماسويتها ولا انصح فيها لان اذا زي ماتقول تفتح البشرة احس شي خطير تستخدمين خلطة تفتيح لطفل مهما قلت ان مكوناتها ماتضر ونستخدمها لطفل لكن خلطها وانها تجلس مدة مخلوطة بالعلبة ممكن تتفاعل وتضر الطفل ابدااااً ابداً لاتخلطون على الاطفال حتى لو ولدك او بنتك اسمر وغير عنكم والناس تعلق وتضايقك يووو مو لكم يوو من وين طلع ذا الاسمر ومن هذي التعليقات البايخه انتي بس شقي الابتسامة وهزي راسك والتفتي عنها وكملي سوالفك مع الي كنتي تتكلمين معها المهم صرفي الموضوع ولاتخوضين في جدال عقيم مع هذي النوعيات الي ماتراعي مشاعر الناس واذا زودتها وكل ماتقابلك تقول هذا الكلام عطيها شي بنص الجبهه كذا جملة قصيرة ف الصميم تحرم تتكلم معك للابد..
ببداء من اليمين :
1- عطر خفيف وناعم بالمسك طبعاً سبري يعني مخفف مو مركز
احرصو عطورات الاطفال مكتوب عليها تواليت يعني عطر استحمام عطورات الاستحمام تكون خفيفة ماتحسس بشرة الطفل ..
اخذته من محل عادي بالقصيم سعرة 12 ريال .
.
2- الكريم الموف والعطر الي جنبة معهم شور جل هم طقم بربري ريحتة اول ماتحطينه كذا ريحه ليمون قووية كنه عطر مغاسل هههههه بس بعد مايبرد شوية تطلع جممميلة انا شخصياً حبيتة لان حسيت ريحتة مميزة دايم الاطفال مسك عود يعني روائح محددة الشاور جل ما استخدمه مباشرة على جسمها احط شوية في دلو واضيف عليه مويا واصبه على جسمها بعدين افركه بيدي او ب اسفنجة ادري بتقولون حرص زايد هو مصمم خاص للاطفال بس بنتي يبقع جسمها احمر اذا حطيت الصابون مباشرة عليها وتجيها حكة عشان كذا اخففه و اللوشن حق المجموعة بعد اخففه مع جل جونسن طبعاً ما احطه لها الا في المناسبات او لو بيجيني ضيوف عشان فيها مواد عطرية مع الوقت تسمر وتسبب تصبغات وزي ماقلت جسمها يتحسس بس العطر عشان ع الملابس لا عادي في اي وقت سعر المجموعة ب 360 .. يستاهل التجربة ممكن احد يقول اسراف على طفلة واذا فكرتي صح بيجلس معها وقت طويل ومجموعة مميزة عن بقية عطورات الاطفال وغير كذا اذا قلتي حدي 50 او 60 عطر لطفلي لمى تكررين الشراء بيطلع تكلفته اعلى من سعر المجموعة وجهة نظري مو ضروري تكون صح او مقنعه ل احد بس انا مقتنعه فيها ..
3- بودرة العود من اجمل احبها انا شخصياً على قولت ابو بينو ريحة شيوخ هههههه
مادري احس ريحتها مع بنتي تدننننن سعرها مايتعدى ال 60 ريال .
4- التولة الصغيرة مسك روز يعني مسك مخلوط مع الورد ما اعرف سعرها لانها جت ابو بينو هدية تولة كبيييرة الي تجي منقوشة بالذهبي هو مايحبها ف كانت من نصيبي انا وبنتي وعبيتها بالصغيرة هذي حلووة ومميزة بس مادري انا شخصياً احب مسك عبدالصمد القرشي العادي مو مسك روز بس قوووي اخاف على بنتي خاصة الحين صدرها تعبان والاضراس الاخيرة بتطلع ف بيتعبها اكيد ..
5- العطر الفوشي تواليت بريحة كوتون كاندي كنه ريحة غزل البنات غالباً استخدمة لها بالبيت او لو بتطلع مع ابوها بقالة والمشاوير القصيرة احب ريحتة تعجبني وغريبة عن التوت و الفراولة والفانيليا انا ما احب لا لي ولا لبنتي الروائح المعتادة
سعرة 18 او 28 ريال اتذكر في 8 هههههه اخذته من الدانوب حياة مول .
6- جل بيبي جونسون انا احب الزيت الي غطاة موف حق النوم مرررة اعشقه
بس كا ترطيب ونتيجته اطول سوى لطفل او لك انتي اكيييد الجل وريحتة طفولية وجميلة سعره ما اتذكر بس اتوقع ب ال 20 .
7- كريم ماذركير الباودر يعني هو كريم بس لمى تدهنين فيه يقلب باودر ع البشرة مرررة فاااااشل وماله ريحة ابداً ولا حتى خفيفة صح يادوب تشمين الريحة اذا حطيتي بيدك بس اذا دهنتي الطفل مررة تختفي سعرة شي و 70 ريال ..
1- ميبو اتوقع كل الامهات يستخدمونه للحفاض حلوو مررة بس انا احطه لها لتحسس اخلطة مع اليكا الاصفر اصلاً هو كذا بوصفة من الطبيب احطهم لها بس بين فترة وفترة لمى تطلع البقع والحساسية يريحها من الحكة ما اتذكر سعرة صراحة ..
2- الجل المعطر من جونسون لوجهها ويدينها كنت استخدم لها السماوي الي بدون عطر بس وصيت اخوي مرة وجاب هذا حلووو مرررة ريحتة ابي اكلها اذا حطيته لها سعرة اتوقع 9 ريال ..
3- فازلين مخلوط مع زيوت منها زيت الحبة السوداء و الزيتون و السمسم ومقري فيه من عطارة الموسى اساساً هم ف الرياض لكن انا اخذته من عطارة الرسيني بالقصيم ب 15 ريال حلو للاطفال لو جتهم ذيك الحالة الي ماتدرين وش يبغى ويصيح ويتحلم وبس معصب ومايخليك تتحركين بين فترة وفترة بعد ما احممها ارطب كامل جسمها فيه ..
4- زيت السمسم و زيت جوز الهند لشعرها بنتي شعرها زين الحمدلله نوعيته كيرلي انا مبسوطة فيها ما ابغاه ناعم مثلي اذا كبرت مالها الا يكون سايح لا تكون تقدر تتحكم فيه بس الي ينرفزني النبت الجديد الي كذا يكون طاير عند الجبين يقهررر مع الاستمرار على هذول الاثنين ينعم الشعر للاطفال الي شعرهم جاف انا ما احطه على طول لان مابيه يصير شعر فلبينيه معجبني كيرلي احب البنات الي شعرهم كيرلي مموج يعني قولوا بالشهر مرة او مرتين احط لها اسعارهم الواحد ب 12 ريال .
5- العشق حقي هذي بودرة بيبي جونسون خاصة للحفاض بالنشاء وظيفتها تمتص الرطوبة المسببة لطفح يوم كانت بينو صغيرة بالاشهر كانت الله يكرمكم حفايضها بامبرز ومررة جاها طفح جلدي الى درجة تجرح وتسلخ الجلد مسيكينه تتشنج اذا سوت شي بالحفاض وتجلس تشاهق وتبكي غيرتها لبيبي جوي وارتحت فررررق عن بامبرز ماتطلع ريحة ولا تزعج الطفل اذا سوى شي المهم عمة بينو دانة الله يجزاها خير وين ماتروح مرة زارتنا وكنت من قبل اقولها عن الطفح جابت لها هذي البودرة و صابونة ديتول للبشرة الحساسة الكيس حقها موف و الصابونة لونها ازرق وخلال 3 ايام راح الطفح نهائي وصرت بين فترة وفترة احط لها من البودرة وقاية يعني من الطفح ما اعرف سعرها والله ..
6- تونيك فازلين لشعر اتوقع الاغلب يعرفة هذا تاخذين نقطة صغيرررة منه وتفركين بيدك وتمسحين على شعر الطفل انا ما احب ريحته بس مجبرة خاصة لنبت الجديد الي قلت لكم عنه انو يقهرني يتطاير يكون سهل التحكم فيه ويرطب شعر الطفل ويكون تمشيط الشعر اسهل معه سعرة 11 ريال ..
هذي صورة اقرب للفازلين ولو تبغون الرقم تتواصلون معاهم وتسئلون وين يتوفر في مدينتكم ..
وبكذا اكون انعيت تدوينتي يارب استفدتو واعجبتكم ..
( التدوينة الجاية باذن الله راح تكون عن عطوراتي )
