عنايتي لبنتي ..

السلام عليكم.. 

اليوم موضوعنا مختلف شوية .. يخص الأمهات او الخوات الي يحبو يهتمو 
ب اخواتهم الصغار ، لمى كنت نفاس في بنتي جبت فلبينية تعرفون شغل النظافة وكذا لوول المهم قالت لي انو انتم السعوديات عندكم تصبغات لان امهاتكم من وانتم صغار مايهتمون بترطيب بشرتكم بنتك لازم كل يوم ترطبين بشرتها وقالت لي على خلطة هم يستخدمونها في الفلبين بس صراحة ما سويتها لبنتي مادري ليش بس حسيتها صغيرة على الشي هذا الخلطة عبارة عن كريم نيفيا الازرق القديم و بودرة جونسون تقولي اخلطيهم و كل يوم رطبيها فيها مادري حسيت ممكن تسبب تحسس لو خلطتها مع بعض وبشرتنا تختلف عن بشرتهم ماسويتها ولا انصح فيها لان اذا زي ماتقول تفتح البشرة احس شي خطير تستخدمين خلطة تفتيح لطفل مهما قلت ان مكوناتها ماتضر ونستخدمها لطفل لكن خلطها وانها تجلس مدة مخلوطة بالعلبة ممكن تتفاعل وتضر الطفل ابدااااً ابداً لاتخلطون على الاطفال حتى لو ولدك او بنتك اسمر وغير عنكم والناس تعلق وتضايقك يووو مو لكم يوو من وين طلع ذا الاسمر ومن هذي التعليقات البايخه انتي بس شقي الابتسامة وهزي راسك والتفتي عنها وكملي سوالفك مع الي كنتي تتكلمين معها المهم صرفي الموضوع ولاتخوضين في جدال عقيم مع هذي النوعيات الي ماتراعي مشاعر الناس واذا زودتها وكل ماتقابلك تقول هذا الكلام عطيها شي بنص الجبهه كذا جملة قصيرة ف الصميم تحرم تتكلم معك للابد..

 هذي الصورة تخص منتجات التعطير و الشاور ..
ببداء من اليمين :
 
1- عطر خفيف وناعم بالمسك طبعاً سبري يعني مخفف مو مركز 
احرصو عطورات الاطفال مكتوب عليها تواليت يعني عطر استحمام عطورات الاستحمام تكون خفيفة ماتحسس بشرة الطفل .. 
اخذته من محل عادي بالقصيم سعرة 12 ريال .

 .

2- الكريم الموف والعطر الي جنبة معهم شور جل هم طقم بربري ريحتة اول ماتحطينه كذا ريحه ليمون قووية كنه عطر مغاسل هههههه بس بعد مايبرد شوية تطلع جممميلة انا شخصياً حبيتة لان حسيت ريحتة مميزة دايم الاطفال مسك عود يعني روائح محددة الشاور جل ما استخدمه مباشرة على جسمها احط شوية في دلو واضيف عليه مويا واصبه على جسمها بعدين افركه بيدي او ب اسفنجة ادري بتقولون حرص زايد هو مصمم خاص للاطفال بس بنتي يبقع جسمها احمر اذا حطيت الصابون مباشرة عليها وتجيها حكة عشان كذا اخففه و اللوشن حق المجموعة بعد اخففه مع جل جونسن طبعاً ما احطه لها الا في المناسبات او لو بيجيني ضيوف عشان فيها مواد عطرية مع الوقت تسمر وتسبب تصبغات وزي ماقلت جسمها يتحسس بس العطر عشان ع الملابس لا عادي في اي وقت سعر المجموعة ب 360 .. يستاهل التجربة  ممكن احد يقول اسراف على طفلة واذا فكرتي صح بيجلس معها وقت طويل ومجموعة مميزة عن بقية عطورات الاطفال وغير كذا اذا قلتي حدي 50 او 60 عطر لطفلي لمى تكررين الشراء بيطلع تكلفته اعلى من سعر المجموعة وجهة نظري مو ضروري تكون صح او مقنعه ل احد بس انا مقتنعه فيها ..

3- بودرة العود من اجمل احبها انا شخصياً على قولت ابو بينو ريحة شيوخ هههههه
مادري احس ريحتها مع بنتي تدننننن سعرها مايتعدى ال 60 ريال .


4- التولة الصغيرة مسك روز يعني مسك مخلوط مع الورد ما اعرف سعرها لانها جت ابو بينو هدية تولة كبيييرة الي تجي منقوشة بالذهبي هو مايحبها ف كانت من نصيبي انا وبنتي وعبيتها بالصغيرة هذي حلووة ومميزة بس مادري انا شخصياً احب مسك عبدالصمد القرشي العادي مو مسك روز بس قوووي اخاف على بنتي خاصة الحين صدرها تعبان والاضراس الاخيرة بتطلع ف بيتعبها اكيد .. 

5- العطر الفوشي تواليت  بريحة كوتون كاندي كنه ريحة غزل البنات غالباً استخدمة لها بالبيت او لو بتطلع مع ابوها بقالة والمشاوير القصيرة احب ريحتة تعجبني وغريبة عن التوت و الفراولة والفانيليا انا ما احب لا لي ولا لبنتي الروائح المعتادة

سعرة 18 او 28 ريال اتذكر في 8 هههههه اخذته من الدانوب حياة مول . 

6- جل  بيبي جونسون انا احب الزيت الي غطاة موف حق النوم مرررة اعشقه 
بس كا ترطيب ونتيجته اطول سوى لطفل او لك انتي اكيييد الجل وريحتة طفولية وجميلة سعره ما اتذكر بس اتوقع ب ال 20 .


7- كريم ماذركير الباودر يعني هو كريم بس لمى تدهنين فيه يقلب باودر ع البشرة مرررة فاااااشل وماله ريحة ابداً ولا حتى خفيفة صح يادوب تشمين الريحة اذا حطيتي بيدك بس اذا دهنتي الطفل مررة تختفي سعرة شي و 70 ريال ..

 نبداء من  اليمين :

1- ميبو اتوقع كل الامهات يستخدمونه للحفاض حلوو مررة بس انا احطه لها لتحسس اخلطة مع اليكا الاصفر اصلاً هو كذا بوصفة من الطبيب احطهم لها بس بين فترة وفترة لمى تطلع البقع والحساسية يريحها من الحكة ما اتذكر سعرة صراحة .. 

2- الجل المعطر من جونسون لوجهها ويدينها كنت استخدم لها السماوي الي بدون عطر بس وصيت اخوي مرة وجاب هذا حلووو مرررة ريحتة ابي اكلها اذا حطيته لها سعرة اتوقع 9 ريال .. 

3- فازلين مخلوط مع زيوت منها زيت الحبة السوداء و الزيتون و السمسم ومقري فيه من عطارة الموسى اساساً هم ف الرياض لكن انا اخذته من عطارة الرسيني بالقصيم ب 15 ريال حلو للاطفال لو جتهم ذيك الحالة الي ماتدرين وش يبغى ويصيح ويتحلم وبس معصب ومايخليك تتحركين بين فترة وفترة بعد ما احممها ارطب كامل جسمها فيه ..

4- زيت السمسم و زيت جوز الهند لشعرها بنتي شعرها زين الحمدلله نوعيته كيرلي انا مبسوطة فيها ما ابغاه ناعم مثلي اذا كبرت مالها الا يكون سايح لا تكون تقدر تتحكم فيه  بس الي ينرفزني النبت الجديد الي كذا يكون طاير عند الجبين يقهررر مع الاستمرار على هذول الاثنين ينعم الشعر للاطفال الي شعرهم جاف انا ما احطه على طول لان مابيه يصير شعر فلبينيه معجبني كيرلي احب البنات الي شعرهم كيرلي مموج يعني قولوا بالشهر مرة او مرتين احط لها اسعارهم الواحد ب 12 ريال .

5- العشق حقي هذي بودرة بيبي جونسون خاصة للحفاض بالنشاء وظيفتها تمتص الرطوبة المسببة لطفح  يوم كانت بينو صغيرة بالاشهر كانت الله يكرمكم حفايضها بامبرز ومررة جاها طفح جلدي الى درجة تجرح وتسلخ الجلد مسيكينه تتشنج اذا سوت شي بالحفاض وتجلس تشاهق وتبكي غيرتها لبيبي جوي وارتحت فررررق عن بامبرز ماتطلع ريحة ولا تزعج الطفل اذا سوى شي المهم عمة بينو دانة الله يجزاها خير وين ماتروح مرة زارتنا وكنت من قبل اقولها عن الطفح جابت لها هذي البودرة و صابونة ديتول للبشرة الحساسة الكيس حقها موف و الصابونة لونها ازرق وخلال 3 ايام راح الطفح نهائي وصرت بين فترة وفترة احط لها من البودرة وقاية يعني من الطفح ما اعرف سعرها والله  .. 

6- تونيك فازلين لشعر اتوقع الاغلب يعرفة هذا تاخذين نقطة صغيرررة منه وتفركين بيدك وتمسحين على شعر الطفل انا ما احب ريحته بس مجبرة خاصة لنبت الجديد الي قلت لكم عنه انو يقهرني يتطاير يكون سهل التحكم فيه ويرطب شعر الطفل ويكون تمشيط الشعر اسهل معه  سعرة 11 ريال ..

 

 هذي صورة اقرب للفازلين ولو تبغون الرقم تتواصلون معاهم وتسئلون وين يتوفر في مدينتكم .. 


وبكذا اكون انعيت تدوينتي يارب استفدتو واعجبتكم .. 


( التدوينة الجاية باذن الله راح تكون عن عطوراتي )


 

رائيي في فرش المكياج من سيفورا + مكياجي ..

اهلين ياجميلاتي ..

 اليوم راح نبحر في عالم المكياج انا واتوقع اغلب البنات نعشششق 
المكياج واهم شي يعتمد عليه نجاح المكياج جودة الادوات الي نستخدمها سواء 
فرش منتجات المكياج منها الفونديشن الكونسيلر وغيرة..

(التدوينة طويلة عشان كذا جيبي لك شي تشربينه او تاكلينه عشان تروقين وتصحصحين معاي )


اليوم راح اكلمكم عن الفرش اتوقع اغلب البنات المدونات تكلمون عنها 
وشرحوا وفصلوا فيها الله يجزاهم خير ان شاء الله ، لكن انا بتكلم عنها بطريقة 
مختلفة راح اتكلم عن طريقة استخدامي لها + ابغى اوصلكم انو مو شرط اساسي 
تكون فرشك ريل تكنيك او سيجما او اي شركة عالمية وغاليه عشان يطلع مكياجك حلوو انا الحمدلله اشوف ان مكياجي دام جميل ومرتب واتوقع اني الميك اب ارتست حقت عائلتي صح بنات خواتي فنانات ماشاء الله بس بنسبة لخواتي يعني عا اساس كبيرة واختهم هههههه المهم فرشي لها سالفة تضحك سافر زوجي شغل لدبي وانا اتقطع من الوناسسة واوصيه على اغراض من هناك من ضمنها فرش ري تكنيك 
قبل تجي عندنا ف السعودية المهم يوم وصل وانتظرة بس يطلع الفرش من الشنطة جايب ملابس وذهب وانا مو معطتهم وجة ابي الفرش يوم شفتهم واصرخ وانبسط ولكن الصدمة طلعو فرش سيفورا وانا انصدم واتحلطم بداخلي واروح على طول ابحث بحسابات البلوقر بالانستغرام احد متكلم عنهم يمدح يذم ماحصلت الا دلال الدوب تمدحهم وانبسسسط المهم جربتهم حلوااات مرررة سعرهم اتوقع قالي ب 800 درهم
مو المجموعة الكامله لكن الاساسيات فقط عددهم 8 فرش .. عاد انتي وشطارتك بالتسوق مثلاً كل مرة تشترين فرشتين لحد مايكون عندك المجموعة كاملة او تخصصين يوم تسوق للمكياج بميزانية تحددينها انتي و الفرش الي تحتاجينها انتي مولازم تكون عندك مجموعة كاملة متكاملة بعض الفرش ماتحتاجينها ف تكون زيادة عدد عندك ممكن بقيمتها تشترين شدو بلشر ارواج شي تستفيدين منه واذا كنتي لسه جديدة ف المكياج اتوقع تحتاجي فقط الفرش الاساسية ، بعد من الفرش الي استخدمتها فرش مكياجي اغلبكم يعرفة انا المحل هذا من قبل تربطني علاقة حب مع ارواجهم و الهايلايتر واللمعات حقاتهم والبلشر لكن الشدو لا تجاربي معه فاشلة مادري لو طوروهم مع الوقت لان بعضهم مايثبتون او بعضهم صلب مايطلع بالفرشة ولو قلنا ممكن مائي ولازم مويا او قطرة او فكس بلس بعد تطلع كنك مهرج قووية بشكل ارجع لفرشهم اذا انتي لسه جديدة بعالم المكياج لاتفكرين تشترين من غيرهم نااااااااعمة فرشهم بششكل جميل ماشفت بنعومتها ومرنه بالاستخدام والتوزيع + اسعارها حلووة اتذكر اشتريتهم من 4 سنوات مجموعة فيها 12 فرشة ب 200 وشي حتى لو انتي محترفة بالمكياج انصحك تجربينها،الحين بفصلكم الفرش الي عندي كل وحدة واستخدامي لها ورقمها ..ترى انا استخدم الفرش على كيفي 
مو شرط زي مايقولون عنها او انها ل شي مخصص لا استخدمها بالطريقة الي تخدم شغلي والنتيجة الي ابغى اطلع فيها .. يالله نبداء .

 هذي فرشة دمج الفاونديشن انا الصراحة حسيتها ماعطتني النتيجة الي اسمع عنها للفرشة مو الشركة ممكن اكون لسه مو متعودة عليها لاني احب اوزع الفونديشن ب اصابعي اول بعدين  ب اسفنجة البيوتي بلندر و هي ناااعمة جداً تهمني نعومة الفرش
 عشان كذا بعطيها فرصة زيادة .. رقمها : 44  

هذي من بودي شوب ااااخ جميلة يابنات لتوزيع الماسكات على الوجة او الفاونديشن حلوووة سعرها مو غالي والله ناسية كم بس بعطيكم سعر تقريبي شي و 60 لاني شاريتها من اربع سنوات  تحسينها توزع من قلب وتغطي كامل المكان الي انتي تمررينها عليه .. انا حالياً خصصتها للماسكات لان عندي نفسها من سيفورا 
حاولت احط لكم رقمها بس ماعليها رقم مدري انمسح من كثر الاستخدام والغسيل او اساساً ماعليها رقم .. 

بسم الله عليكم وحدة وحدة ادري خوفكم شكلها بس اثناء ما انا اصور اخذتها بنتي
وقامت ترسم لوحة فنية وهمية على الجدار يبغى لي اغسلها واسمي عليها هي بعد بعد التكفيج الي جاها عشان ترجع لوضعها الطبيعي لووول .. شكلها يشبة الرصاصة 
تستخدم للكونتور يعني لتحديد الوجة الخدود والفك والجبين بنات بما اننا بسالفة الكونتور حبيباتي انتم مو عشان الوقت هذا انتشرت السوالف بالكونتور ونحت الوجة لازم كلنا نسوية لا ياحبيباتي انتي وجهك تفاصيلة واضحه خلاص ماتحتاجين انتي ماتعرفين لاتهولين بعمرك انا شخصياً ما اسوي كونتور الا للأنف لان عندي هذا مادري وش يسمونه الي كنه تل مدري ايش الي يجي بنص كنه انتفاخ لان صار لي حادث وانا صغيرة وطلع لي مو باين مرة بس انا بالزواجات اصلحه كذا شي نفسي مع ان خواتي يهاوشوني يقولون خشمك طويل اذا حددتيه يطول زيادة فشلوني حسبي الله صرت اقصرة .. في شي بالكونتور نفسي اتعلم له كيف ابرز وجنتي مو انحف وجهي لا انو تطلع الوجنة بارزة كنك حاقنه او منفخه شفته باليوتيوب بس يبغى لي اطبق عشان اتعلم اقولكم شي وماتضحكون انا هذي الفرشة اوزع فيها الكونسيلر بالمكان الضيق تحت العين عند مدمع العين توصل مضبوط اذا طالعتي فوق  وبعد احياناً استخدمها ل اضاءة الانف من الوسط تعطيك كل مرتب ..

رقمها:58 .

هذي الي قلت لكم تشبة حقت بودي شوب بس هذي اقصر طول جممميلة لتوزيع الفاونديشن تغطي البشرة بشكل مرتب وماتترك خطوط لا مررة ذرب يطلع الشكل النهائي معاها بعد استخدمها للكونسيلر و للهايلايتر ب اعلى الخد والانف  

رقمها : 47.

هنا الفرش المشطوفة حقت مكياجي الي فوق وحقت سيفورا تحت مثل ماهو واضح بالصورة ، حقت مكياجي نااااعمة وحلوة بالرسم اتوقع يبغى لي اشتري جديدة لان مثل ماقلت من اربع سنوات عندي هي ماتغيرت ومازال رسمها حلو بس رحمتها احس ادت دورها وزيادة اما حقت سيفورا يابسة ومتماسكة اكثر بس خشنه لمى ارسم فيها الايلاينر ف خليها بس للحواجب .. بعد احياناً لو مستعجلة اسوي كونتور الانف فيها وادمج بفرشة ثانية اكيد بعد ما انظفها حقت مكياجي ماعليها رقم اصلاً مسيكينه ماعليها معالم رايحة 

حقت سيفورا رقمها : 22 .

هذي اكثر فرشة حابتها احسني كنت ضايعة بدونها تستخدم لتوزيع الشدو او اللمعة في الاماكن الضيقة مثلاً مدمع العين تحت ممكن تنظفين فيها شغلك تحطي لون مطفي او لامع تحت الحاجب تحددين رسمة الحواجب فيها بكونسيلر او اساس لانها متماسكة وصغيرونه تتحكمين فيها بالشغل ممكن تحطي الاضاءة فيها بعد ممكن تدمجين فيها الكحل تحت العين او لو ماتبغين رسمة الايلينر تكون صريحه تسوين له تمويه فيها

رقمها: 11 .

هذي قالت لي الموظفة انها للكونتور الدقيق هي مشطوفة لكن مدببة فهمتوني يعني
مو مضغوطة لا كذا اسطوانيه مشطوفة يارب فهمتني انا شخصياً ما استخدمها للكونتور احب ادمج الشدو فيها او ارسم الزاوية الخارجية فيها 
مثل ماقلت فرش مكياجي ماعليها ارقام يمكن الحين حطو لها ارقام ما اعرف ..

فرشة الايلينر من انجلوت جميلة ومضبوط الرسم فيها لكن بعد ماشفت فرشة ريل تكنيك عند بنت اختي احس بخاطري وبتطلع اضبط بالرسم راسها سيليكون شفاف وبس تمسحينها بمنديل مبلل تنظف اتوقع قالت لي ب 80 من وايتس اخذتها او من تاجرة انا ما اسب انجلوت لا حلوووة مرة وتعطيك النهاية السبعة مضبووطة مرة يعني مايطلع النهاية مربع وتعدلين وتصير عريض وتعدلين لحد ماتعصبين لا  نهايتها جميلة عموماً الايلينر يعتمد على خفت يدك بالرسم
بس اقولكم عن ريل تكنيك اعطيكم فكرة عنها .. رقم فرشة انجلوت :30T

فرش الشدو الي ع اليمين واليسار تبع بالت نيكد 1 و2 جميلات ويادون الغرض
الي بالوسط من مكياجي حلوووة مررة  ..
 

هذي الجهه الثانية من فرشة نيكد 2 حلوووة حلووة لدمج الشدو ممكن تشترين 
فرشة دمج من اي مكان ثاني نفسها في ناس يسمونها فلافي برش في ناس يسمونها بلندنق برش  .. 
 

هذي الصراحة ما اعرف هي خاصة ل ايش بالضبط هي نفس فرش الشدو بس طويل الشعر حقها شوي انا شخصياً استخدمها كثير لتوزيع الشدو بشكل عام او للمعة على مدمع العين او لتحت الحاجب وممكن ارتب فيها اطراف حواجبي بالكونسيلر عشان اوضح الرسمة ..

هذي نفس فرشة البلشر بس مو دائرية او مدببه او نهايتها قوس لا مايلة 
استخدماتي لها كثير احيان للبلشر احيان لتوزيع الباودر على الاماكن الدهنية 
احس بعد حلووة مررة لتحديد الخد بالباودر او لمعة بتطلع النتيجة جممميلة مرررة 

رقمها : 59 .


معلومة ابغى اوصلها لكم ادري بقولون تستخدمين الفرش ب استخدامات كثيرة مو لشي المخصص لها قناعتي الشخصية انو انا الي اتحكم بالفرشة مو هي الي تتحكم فيني واذا اعطتني النتيجة الي انا ابغاها اكتفي بهذا مو شرط تكون عندي كامل الفرش عشان اطلع خلاص محترفة ومافي احسن من مكياجي اتذكر كانت معي بنت بالجامعة 
مكياجها كلة ماركات عالمية واحسن الفرش عندها وماتتنازل تشتري غير ديور شانيل ايستي لودور اف سان لوران لكن ماتعرف بس تجي مناسبة تتصل علي اروح لها امكيجها كانت تقولها امها انتي تشترين غالي بس ماتعرفين له خساير ع الفاضي ههههههههه .. 

هنا انهي تدوينتي يارب استمتعتو و استفدتو ولو عندكم اي استفسار ع الانستغرام اكتبوة لي ..

ماسك الفحم لتنقية البشرة ..

مرحبا ...


لحظة خليني اتغطاء متفشلة منكم مرررة مالي وجة 

حسيتني سحبت وقت طويل عنكم بس وش اسوووي غصصب عني 

من توظفت ب ذا المدرسة المخيسسه وانا حايسة ومتصبرة عشان اخذ منهم 

خبرة و عشان يقيموني الوزارة .. والله كل ما اقوم اقول خلاص مو مداومة ثاني 

بس اهزاء نفسي واداوم اقول بكيفهم خل يضغطوني بتجاهلهم واسوي الي ابي 

لازم اصير عقلانية وش ذا الدلع ؟؟ والي مصبرني المعلمات قمممة الحمدلله وفقني بزميلات روووعه قليل بحقهم .. 



المهم تدوينتنا اليوم عن ماسك الفحم لتنقية البشرة .. بقولكم ليش استخدمته 

بصراحة من داومت وانا عندي منطقة الذقن يطلع فيها حبه حبتين 

مع ان بشرتي صافية .. بس اتوقع عشان اللمس غبار واكتب ع السبورة 

ويديني تتوسخ وبعدين اذا جلست اتكي يدي على وجهي عشان كذا طلع حبوب



الماسك يساعد على تنقية البشرة ومع الاستمرار يخفف المسام 

انا لاحظت مسام الانف عندي مو الي مرة واضحة لكن موجودة الصدق

حسيتها صغرة اكثر انا حالياً استخدم صابونة المرة عشان تعقم بشرتي

اخذتها من العطار ب اتوقع 10 ريال .. 


مكونات الماسك مثل الصورة : 


زبادي يفضل منتهية صلاحيتة .. عشان يفيد البشرة اكثر 

كبسولات الفحم الي عندي مخلوط فيها نعناع وبابونج هي حلوووة 

بس شغلة لازم تجيبين ابرة خياطة وتعقمينها بمسحة وتدخلينها بالكبسولة 

عشان تطلعين العصارة الي جواء الي لها بال تخربط مثلي تجيب الي بصورة 

والكسولة .. تستخدم النوع الثاني بس تفكين الكبسولة وتصبين البودرة الي

 داخل ف الزبادي وخلطية  و اضيفي موية ورد مقدار ملعقة صغيرة ..


وتمتعي ببشرة نقية ان شاء الله .. قبلاتي لكم .. 

هذي الكبسولات النوع الثاني الي قلت لكم اسهل بالاستخدام .. 


وبس بكذا انتهينا يارب اكون افدتكم وعوضتكم عن الغيبة ..

قنوات اليوتيوب المفضلة عندي ..

مرحبا .. 

احس التدوين او متابعة المدونة جزء من الروتين اليومي حقي .. 

اليوم حبيت ادون عن شي مختلف..


التدوينة اليوم عن القنوات الي احب اشوفها دايم ع اليوتيوب .. 


راح اصنفها لك

قنوات التجميل ..

(١)

لورين بنت استرالية .. تنزل فيديوهات طريقة مكياجها ..





تقدرون تقولون ستايلها بالمكياج نفس ستايلي احب اركز بالمكياج على عيوني 

بالنسبة للفاونديشن تحب النوع الثقيل الفل كفر  انا بالنسبة لي احس اني ما احتاج هذي التغطية اخذ ميديم كفر يعني وسط الحمدلله بشرتي ماتحتاج طبقة تغطية كبيرة ..

lauren currtis

اول ماتحطونها بالبحث حق اليوتيوب بتطلع لكم قناتها ..

(2) 

البنت الثانية من الاكسنت حقتها اتوقع بعد استرالية  

اسمها ..  shaaanxo

بعد هذي يعجبني مكياجها بس البنت بثرة شوي يمكن لو شفتو مقاطعها بتفهموني 
احس انها تميلح وتستعرض شوي بتقولون لي انتي نفسيه ههههه لا بس شوفوا شكلها وتعابير وجهها وهي تحاول تكون ظريفة مادري كيف ’ ماعلينا المهم تشوفون مكياجها جميل ..

(3)

اسمها ..  dulce  candy 


هذي الصراحة كنت اتابعها بس مادري كيف احس تغيرت نظرتي لها بعد ماشفت لها مقطع تقول انها عسكرية وشاركة ف حرب العراق وانو زوجها ينصدم اذا شافها تفصخ لبسها العسكري وتشغل الكام وتنزل فيديو عن المكياج والفاشن بس مايمنع ان طريقة شغلها بشعرها جمميل ..


الشعر صراحة مافي قناة معينة بس اكتب ف البحث 


hairstyles 

hair tutorial


ويطلع لي كل شي متعلق بستايلات او تساريح الشعر .. بعرض لكم كم قناة اعتبرها مرجع هذول البنات اتابعهم بس نسيت اسمائهم وانا اسولف مع بنت اختي عن التدوينة ذكرتني فيهم .. شكراً جيييج 

(4)
ماشاء الله هذي اصلاً شعرها مساعدها يضبط جممميل شغلها ..



اسمها .. luxy hair 











(5)

هذي احبها صراحة تساريحها احس يصلحون لمناسبات و زواجات تحسونها محترفة بالي تسوية البططة ذي ليتها تجي تسوي دورات بصالوناتنا يتعلمون منها .. 



اسمها ..womenbeauty1 

(6)


هذي شغلها رقييييق بقوووة وناعم .. 


اسمها lilith moon


قنوات المنزل و المطبخ ..

(7)
 

a chic thing 

هذي القناة قريب عرفتها وانا فخورة فيها هي بنت سعودية تنزل طبخات لذيييذة وبسيطة 

(8)


athomewithnikki 

هذي انسانة فضضضيعه بالترتيب ماشاء الله شششي طريقة ترتيبها وتنظيمها نفسي اوريكم مقاطع لها بس حالياً بنتي مزعجتني مو قادرة اركز بس بنزلكم صورة من الفيديو حق ثلاجتها ودي اجيبها شغالة عندي هههههههه لو تسمعني ..



بعطيكم كلمات تحطونها بالبحث حق اليوتيوب وتطلع لكم مقاطع تنظيم ..

تنظيم المنزل: 

organization  home

تنظيم المطبخ :

ganization kitorchen


طبعاً اكيد عارفين اليوتيوب من تفتحين مقطع تطلعين مختمة اليوتيوب كله 
تفتحين من مقطع لمقطع .. 


بكذا اكون خلصت التدوينة ويارب اكون افدتكم واعتذر لو كانت التدوينه ناقصة او فيها اخطاء  بنتي تعبانه وتعرفون نفسية الطفل التعبان ماتخليك تركزين بشي الله يعافيها ويخليها لي يارب ..


راح اعدل ع التدوينة ولو عدلت بعلن لكم ع الاينستغرام عشان ابغى اضيف روابط قنوات اليوتيوب الي تكلمت عنهم لان عندي مشكلة ف البلوج ما اقدر اضيف روابط انتقال لليوتيوب ..

تجربتي ل مجموعة التفتيح من ايف روشية ..

مرحبا ..


اليوم راح اكلمكم عن تجربتي لـ مجموعة التفتيح من محل إيف روشية

المحل أنا شخصياً دائماً أدخلة واتردد اخذ منة بصراحة احس احتار ومالي تجارب سابقة معاه ..

مرة شفت بنات خواتي يسولفون عن منتج من عندهم هو عبارة عن ميلك لتنظيف الوجة والمكياج 

المهم بنتي اختي الي مشتريتة أنا اعرفها بشرتها حسسساسة جداً وادخل معهم بالموضوع واستفسر منها تقولي خالة اعجز اعبر لك عنه جممميل المنتج 
ومن قلب ينظف وماحسس بشرتي ولا شي وحتى لو غسلة المكياج ونظفته  

وحطيت الميلك هذا يطلع باقي المكياج بالقطن انا اعجبت فيه صراحة .. 
عاد تعرفون اذا وحدة من الخوات

 او بنات الخوات جابت شي جديد ومدحته لازم الكل يجربة لين نخلصه ع البنت ههههه بس الحمدلله ماخلصناه عليها

قلت بخاطري اول ما برجع الرياض بشتريه ونسيت السالفة فجاءة اسولف مع اختها بالوتس اب ونتكلم عن الشعر قالت لي انها اشترت شامبو من إيف روشية خاص لشعر الدهني طريقتة يخلص الشعر من جممميع الدهون والرواسب بالشعر 
وينظفه بس عيبه يجفف الشعر شويتين لازم بلسم او ماسك لشعر بعدة انا بعتقادي مثل هذي الشامبوهات ماتستخدم كل يوم اتوقع مرة بعد اسبوعين او اذا عندك مناسبة وماتبين شعرك يلصق .. اعجبت جداً بالشركة والي اعجبني اكثر اسعارها حلوووة 

كنت بنفس اليوم بطلع السوق وعلى طوول اول محل دخلته  انا من بعد ماسقطت بيبي احس بشرتي مادري كيف اوصف لكم صارت باهته وشاحبة شوي  مع اني متغذية زين بعد التسقيط و حاطة خلطة بس مادري مو زي بشرتي بالعادة  كلمت الموظفة عن المشكلة الي عندي وماشاء الله مبين فاهمة البنت فرعهم الي بحياة مول والله ماني  متذكرة اسمها بس قصيرة وكل مااسئل عن شي البنات ينادونها تكلمني عن الشئ الي سئلت عنه  تقريباً هي الوحيدة الي فاهمة بالمحل .. المهم نصحتني بمجموعة التفيح اخذتها وبعد ماجربتها تقريباً ثالث يوم حسيت بشرتي بدت تتغير انا استخدمتها مرتين قبل انام واول ما اصحى من النوم .. بعد اسبوع ونص صدق بشرتي تحسنت ما اقولكم فتحت لاني انا ما اخذتها عشان هذا الشي اخذتها على اساس النضارة والاشراق ومن جد يابنات تغيرت بشرتي معاها الموظفة قالت لي اذا بشرتك جافة او مختلطة لجافة بتناسبك اذا دهنية او مختلطة لدهنية ماتناسبك انا مختلطة  لجافة ف مناسبتني الحمدلله تعرفون لمى اغسل وجهي بالغسول واحط التونر وكريم الوجة و كريم محيط العين احس وجهي فريش وصحي في لمعة صحية ونضارة حبيتها من جد بس بصراحة كريم محيط العين مافتح لي الهالات يعني الي بتشتري المجموعة لها حرية الخيار  تستغني عنه او تشترية يمكن انا ماناسبني ويناسب غيري انا بس اتكلم عن تجربتي مانفع معاي مع ان هالاتي مو مرة غامقة بس موجودة ف لو خلصت من عندي بجرب مجموعات ثانية من عندهم لان الصراحة حصل هذا المحل على ثقتي .. وانصحكم فية بقووة 

هذي صورة المجموعة نبداء من اليسار الغسول الجميل فية انو ماينشف الوجة حبيتة 
التونر يعطيك شعور بالانتعاش جممميل والكريم المرطب يرطب لك بشرتك بدون مايخلي اثر دهني ع الوجة انا شخصياً اضفت له قطرات من زين جنين القمح سوو سيرش وبتحصلون معلومات كثير بختصرها لكم ان العلماء الي اكتشفوه سموه ترياق الشباب والفراعنة القدماء يستخدمونه بكثرة ..   الي على شكل مرهم هو المرطب لمحيط العين ومفتح للهالات ماحصلت اي نتيجة منه استبدلته بزبدة بالمرز الي نزلت بوست عنها بالانستجرام لسه باديه فيها ما اقدر احكم بالنسبة لمحيط العين  ومثل ماقلت هذي تجربتي الشخصية الي تبي تفتيح عندهم سيرم تابع للمجموعة مفتح مركز لتفتيح السريع 

شي ثاني عجبني بالمحل مجموعات الشور ريحتها فواحة وثابته نفس العطور الفرنسية اخذت منهم الكروت الي بخت لي عليهم ثبتت بشنطتي ريحتهم حتى نقابي غسلته وباقي فيه  .. بوريكم مجموعة انجنيت عليها اغرمت فيها ااااخ ريحتها بطططلة بس كان عندي مجموعات كثير قلت بخلصهم بعدين اخذها

العطر نفس العطور الفرنسية ريحتة جميلة وتحسين واضحة حبيتها 

بس لاتخلصونها علي الفترة هذي معاقبة على كثرة الطلعات هههههههه
اخاف اذا جاء الافراج ما احصلهاloool 


وبس انتهينا ان شاء الله استفدتوو ..

طريقة اعداد فطيرة زعتر لذيذة ..

مرحبا ..





احسني صايرة قلق اليوم بس ماعليش تحملوني .. بنزل طريقتي في اعداد الفطيرة  ..


( قبل كل شي حبيت اعتذر على الصور بالتدوينة الي راحت وهذي لان الشاحن حق بطارية الكام ضايع 
بس احصلة او اشتري جديد ابشرو بالصور السنعة )

اول شي بقولكم ترى انا من الناس الي تخبص بالطريقة وماتسويها بحذافيرها واحب اضيف من عندي ابداعات 

العجينة عجينة الربع ساعة نقصت من المقادير لشخصين يعني المقادير الي بحطها بتطلع لك صينية صغيرة 

عاد انتي وشطارتك قيسي الكميات الي تكفي العدد الي بتسوين له طبعاً لو بتسوون سيرش لطريقة العجينة
بتحصلونها مرحلتين جربتها وماضبطت هذا شي الشي الثاني كنت صايمة عاشورا ومالي خلق حوسة 
فا جمعت المقادير بمرحلة وحدة اسرع لي .. :)


مقادير العجين & الطريقة :


2 كاس ونص دقيق ابيض ..
كاس ونص ماء دافي ..
نص ملعقة ملح ..
فنجال حق القهوة سكر غير مطحون ..
ملعقة كبيرة خميرة ..
ملعقة صغيرة باكنج باودر 
ثلاث ملاعق كبيرة حليب بودرة 
نص كاس زيت ..


اخلطي المقادير الجافة اول بعدين السائلة اذا حسيتي العجين لينة مررة زي المويا زيدي دقيق شوي 
العجينة لما تطلع معك العجينة كويسة اصلاً بتطلع لينه شوية ماعليك خليها وكملي لك شغلة غسلي المواعين 
حضري لك اي شغلة انا خليتها تقريباً نص ساعة بعدين صبيت العجين بالصينية وطبعاً معروف تدهن قبل بزيت 
هنا عاد سرر الطبخة حقي في اكثر من طريقة ممكن تكون الطبقة الي فوق العجين جبن مالح
 وزيت زيتون وزعتر او  لبنة وزعتر الي يعجبكم انا شخصياً اخلط 

( 3 ملاعق كبيرة زبادي + ملعقتين جبن سايل + 3 ملاعق لبنة + زيت زيتون )

بيطلع معاك طعم اليييييم لذيييييذ التزيين نعناع مجفف زعتر سماق 

دخليها الفرن وبعد ماتخلص خليها تبرد شوي بس غطيها بمنشفة خفيفة اكتشفت ان هذي الطريقة 
ماتخلي الفطيرة او الكيك ينفش او ينخفض من فوق .. جربون ليش لا ؟


هنا خلصنا .. اتمنا تستمتعون بالطعم الذيذ وقولوا لي تجاربكم ع الانستجرام .. 






glamourmyplog



 

أدارة الوقت + المنزل ..

مرحبا ..

 اليوم حبيت اتكلم معاكم عن ادارة الوقت و أدارة المنزل .. 

مارح اقولكم انا ناجحة جداً بهذا الشئ اكيد لا لكن احاول .. حتى الاشخاص البروفاشنيل بهذي الامور 
لابد مايتلخبط نظامهم لان هذا الأمر راجع لشي خارج عن ارادتنا مثلاً تكونين مضبطة جدول معين 
فجاءة يطلع زوجك بدري من الدوام او يتاخر او تجيك طلعه مفاجاءة او زوار او يتعب طفلك.. 
 
مثل هذي الامور تجبرك تغيرين خطتك لازم تكونين متساهله من ناحية كيف يمشي يومك 
احنا بشر مو ساعة ولازم تمشي على خطوات معينة ولا تتغير وبالوقت المحدد ..  انا شخصياً 
اول ماسمعت عن هذا الموضوع قلت بنفسي وووين مع زوجي وبنتي مايمشي ولا يصلح لهم ابد
وبعدين وين متعت الحياة اذا انا بمشي نفسي وبيتي وحياتي على جدول محدد ونظام معين 
صار مقر عسكري مو بيت .. ولكن شفت اني تعبت من الحياة الفوضوية الي انا عايشتها 
مو فوضويه مرة يعني بس بالنسبة لي شي مزعج اني اسهر للفجر وننام ونصحى الظهر ومادري متى نرجع 
ننام واواقات اكلنا مو مثل الناس يعني عاااادي جداً نتغداء الساعة 4 العصر ونتعشاء11 ونص بالليل ..

سبب لي قلق هذا الموضوع .. 

هنا وقفت مع نفسي وقلت لازم احط نظام لكن كيف راح يكون النظام ؟؟

حطيت ف بالي إني مستحيل بمشي عليه مضبووط ونفس الي انا مرتبته 
ولازم يكون في تساهلات ومواعيد مرنه اول يوم واجهت صعوبة 
لان شي جديد علي وثاني يوم على طول تعودت على الوضع وتأقلمت 
معاه الصراحة يابنات احسس ارتحت واحس حصلت لي وقت لنفسي 
اني ارتاح فيه واصفي ذهني واجمع افكاري ولقيت بعد وقت اعتني فيه بنفسي ..
قبل كنت غرقانه  بين المواعين والملابس والمكانس والممسحات 

بنزلكم صورة الجدول اخر التدوينة .. وبشرح لكم إن شاء الله ..

لكن الحين بعطيك اشياء ممكن تفيدك ؟؟ اعتبريها قواعد اساسية او نصائح متبادلة بين ربات البيوت

هذي النصائح موجهه بشكل خاص للعرايس حبيبات قلبي او الامهات الجديدات مو انقاص من احد
ولكن لانك داخلة على حياة جديدة ومرحلة مختلفه طبيعي جداً انك بتتلخبطين وبتضيعين شوي بس ركزي معاي 



1- لاتطلعين من المطبخ وفي ملعقه وصخة نظفي كككل شي لاتخلين شي وراك لان مهما تعبتي وطفشتي 
انتي الخسرانة بتتكدس المواعين عليك .. 

2- خصصي يوم للغسيل و يوم للكوي عشان تحصلين لنفسك وقت وتقللين الجهد ..

3- اكثري من الاستغفار و الحوقله يعني ( لاحول ولا قوة الا بالله ) اولاً الاجر العظيم الي بتحصلينه 
وتقضين وقتك بشي تستفيدين من للأخرتك هذا شي، الشي الثاني بتخلصين بسسرعة ماتوقعتيها..

4- لاتنامين وفي شي طايح  او مو مرتب لان بنهاية بيتكدس ويتكدس ويتكدس وتنعفس الدنيا وبيجيك تعب 
فضضيع وانتي تنظفين ..

5 - مرة او مرتين بالشهر تعاملي مع شغالة تجيك تنفض البيت معك من فوق لتحت 
عشان تساعدك بالاشياء الي تعجزين عنها او ماتقدرينها ومايتراكم عليك ..

6- قد ماتقدرين شغلي البقرة ف بيتك خصصي لها وقت باليوم المهم تشغلينها فيه صدقوني 
بتحسون براحة وسكينة  واطفالكم بيهدون وحتى المشاكل السخيفة الي بتصير بينك وبين زوجك
 تدريجياً بتختفي بتحصلين بركة بالوقت والجهد والرزق وكثيير كثير فوائد لها .. 

7- حطي لك خطة بالطريقة الي تناسبك بترتيب دولاب المطبخ الملابس المنظفات 
عشان يسهل الوصول اليها وبسرعة ويقللك وقت وجهد .. 


من الاشياء الي ساعدتني ب أدارة وقتي وبيتي البورد من جد مفيدة يابنات خاصة 
النوعية الي مثلي لازم كل شي قدامها ولا تنسى .. قبل كنت حاطتها بغرفة الملابس فوق 
طاولة الكوي الحين غيرة مكانها على باب المطبخ .. بوريكم صورتها عاد ماعليكم من شكلها بسوي لها
عملية تجميل بس اصبرو علي احصل فكرة واروق عليها ..

 
 

 صورة اقرب لجدولي والمهام اليوميه الصورة قديمة حق يومين المواعيد مرنه و المتوقع 
قبل كنت اقول مستحيل ينضبط نومنها ومع الجدول 1 ونص سهرانين مرررة قبل كنت اقولكم ماننام الا الفجر 
ياربي لك الحمد والشكر سسسعيدة بالتغيير لو كان بسيط لان الامور الجيدة والايجابية دايم تبداء بالتدريج 

عاد مططو عيونكم خطي صغير وشين اعتذر على هذا الامر .. ممكن جدولي يلهمكم تصممون
 جدول خاص على حسب ظروفكم ويومكم ..


بحط لكم صور لدولاب المعيشة قبل وبعد التنظيم ..

 هذي قبل .. اتذكر ارسلتها لوحدة من صديقاتي قالت هذا حووسة بمسحها من الاستديو لا يشوفها زوجي 
وينقد علي ويقارن هههههههه ..

 
هنا بعد اول ماخلصت صورتة قبل اكنس عشان كذا تجاهلو الحوسة الي تحت .. 


مجررد افكار تلهمك لتغيير للافضل ولراحتك .. هنا انهي التدوينة يارب تعجبكم وتكونون استفدتو منها 

اتمنا يكون في ابداع بالفكر فكرة البورد والجدول مو حكر على ربات البيوت ممكن للموظفة او الطالبة ..

بالتوفيق للجميع .