قنوات اليوتيوب المفضلة عندي ..

مرحبا .. 

احس التدوين او متابعة المدونة جزء من الروتين اليومي حقي .. 

اليوم حبيت ادون عن شي مختلف..


التدوينة اليوم عن القنوات الي احب اشوفها دايم ع اليوتيوب .. 


راح اصنفها لك

قنوات التجميل ..

(١)

لورين بنت استرالية .. تنزل فيديوهات طريقة مكياجها ..





تقدرون تقولون ستايلها بالمكياج نفس ستايلي احب اركز بالمكياج على عيوني 

بالنسبة للفاونديشن تحب النوع الثقيل الفل كفر  انا بالنسبة لي احس اني ما احتاج هذي التغطية اخذ ميديم كفر يعني وسط الحمدلله بشرتي ماتحتاج طبقة تغطية كبيرة ..

lauren currtis

اول ماتحطونها بالبحث حق اليوتيوب بتطلع لكم قناتها ..

(2) 

البنت الثانية من الاكسنت حقتها اتوقع بعد استرالية  

اسمها ..  shaaanxo

بعد هذي يعجبني مكياجها بس البنت بثرة شوي يمكن لو شفتو مقاطعها بتفهموني 
احس انها تميلح وتستعرض شوي بتقولون لي انتي نفسيه ههههه لا بس شوفوا شكلها وتعابير وجهها وهي تحاول تكون ظريفة مادري كيف ’ ماعلينا المهم تشوفون مكياجها جميل ..

(3)

اسمها ..  dulce  candy 


هذي الصراحة كنت اتابعها بس مادري كيف احس تغيرت نظرتي لها بعد ماشفت لها مقطع تقول انها عسكرية وشاركة ف حرب العراق وانو زوجها ينصدم اذا شافها تفصخ لبسها العسكري وتشغل الكام وتنزل فيديو عن المكياج والفاشن بس مايمنع ان طريقة شغلها بشعرها جمميل ..


الشعر صراحة مافي قناة معينة بس اكتب ف البحث 


hairstyles 

hair tutorial


ويطلع لي كل شي متعلق بستايلات او تساريح الشعر .. بعرض لكم كم قناة اعتبرها مرجع هذول البنات اتابعهم بس نسيت اسمائهم وانا اسولف مع بنت اختي عن التدوينة ذكرتني فيهم .. شكراً جيييج 

(4)
ماشاء الله هذي اصلاً شعرها مساعدها يضبط جممميل شغلها ..



اسمها .. luxy hair 











(5)

هذي احبها صراحة تساريحها احس يصلحون لمناسبات و زواجات تحسونها محترفة بالي تسوية البططة ذي ليتها تجي تسوي دورات بصالوناتنا يتعلمون منها .. 



اسمها ..womenbeauty1 

(6)


هذي شغلها رقييييق بقوووة وناعم .. 


اسمها lilith moon


قنوات المنزل و المطبخ ..

(7)
 

a chic thing 

هذي القناة قريب عرفتها وانا فخورة فيها هي بنت سعودية تنزل طبخات لذيييذة وبسيطة 

(8)


athomewithnikki 

هذي انسانة فضضضيعه بالترتيب ماشاء الله شششي طريقة ترتيبها وتنظيمها نفسي اوريكم مقاطع لها بس حالياً بنتي مزعجتني مو قادرة اركز بس بنزلكم صورة من الفيديو حق ثلاجتها ودي اجيبها شغالة عندي هههههههه لو تسمعني ..



بعطيكم كلمات تحطونها بالبحث حق اليوتيوب وتطلع لكم مقاطع تنظيم ..

تنظيم المنزل: 

organization  home

تنظيم المطبخ :

ganization kitorchen


طبعاً اكيد عارفين اليوتيوب من تفتحين مقطع تطلعين مختمة اليوتيوب كله 
تفتحين من مقطع لمقطع .. 


بكذا اكون خلصت التدوينة ويارب اكون افدتكم واعتذر لو كانت التدوينه ناقصة او فيها اخطاء  بنتي تعبانه وتعرفون نفسية الطفل التعبان ماتخليك تركزين بشي الله يعافيها ويخليها لي يارب ..


راح اعدل ع التدوينة ولو عدلت بعلن لكم ع الاينستغرام عشان ابغى اضيف روابط قنوات اليوتيوب الي تكلمت عنهم لان عندي مشكلة ف البلوج ما اقدر اضيف روابط انتقال لليوتيوب ..

تجربتي ل مجموعة التفتيح من ايف روشية ..

مرحبا ..


اليوم راح اكلمكم عن تجربتي لـ مجموعة التفتيح من محل إيف روشية

المحل أنا شخصياً دائماً أدخلة واتردد اخذ منة بصراحة احس احتار ومالي تجارب سابقة معاه ..

مرة شفت بنات خواتي يسولفون عن منتج من عندهم هو عبارة عن ميلك لتنظيف الوجة والمكياج 

المهم بنتي اختي الي مشتريتة أنا اعرفها بشرتها حسسساسة جداً وادخل معهم بالموضوع واستفسر منها تقولي خالة اعجز اعبر لك عنه جممميل المنتج 
ومن قلب ينظف وماحسس بشرتي ولا شي وحتى لو غسلة المكياج ونظفته  

وحطيت الميلك هذا يطلع باقي المكياج بالقطن انا اعجبت فيه صراحة .. 
عاد تعرفون اذا وحدة من الخوات

 او بنات الخوات جابت شي جديد ومدحته لازم الكل يجربة لين نخلصه ع البنت ههههه بس الحمدلله ماخلصناه عليها

قلت بخاطري اول ما برجع الرياض بشتريه ونسيت السالفة فجاءة اسولف مع اختها بالوتس اب ونتكلم عن الشعر قالت لي انها اشترت شامبو من إيف روشية خاص لشعر الدهني طريقتة يخلص الشعر من جممميع الدهون والرواسب بالشعر 
وينظفه بس عيبه يجفف الشعر شويتين لازم بلسم او ماسك لشعر بعدة انا بعتقادي مثل هذي الشامبوهات ماتستخدم كل يوم اتوقع مرة بعد اسبوعين او اذا عندك مناسبة وماتبين شعرك يلصق .. اعجبت جداً بالشركة والي اعجبني اكثر اسعارها حلوووة 

كنت بنفس اليوم بطلع السوق وعلى طوول اول محل دخلته  انا من بعد ماسقطت بيبي احس بشرتي مادري كيف اوصف لكم صارت باهته وشاحبة شوي  مع اني متغذية زين بعد التسقيط و حاطة خلطة بس مادري مو زي بشرتي بالعادة  كلمت الموظفة عن المشكلة الي عندي وماشاء الله مبين فاهمة البنت فرعهم الي بحياة مول والله ماني  متذكرة اسمها بس قصيرة وكل مااسئل عن شي البنات ينادونها تكلمني عن الشئ الي سئلت عنه  تقريباً هي الوحيدة الي فاهمة بالمحل .. المهم نصحتني بمجموعة التفيح اخذتها وبعد ماجربتها تقريباً ثالث يوم حسيت بشرتي بدت تتغير انا استخدمتها مرتين قبل انام واول ما اصحى من النوم .. بعد اسبوع ونص صدق بشرتي تحسنت ما اقولكم فتحت لاني انا ما اخذتها عشان هذا الشي اخذتها على اساس النضارة والاشراق ومن جد يابنات تغيرت بشرتي معاها الموظفة قالت لي اذا بشرتك جافة او مختلطة لجافة بتناسبك اذا دهنية او مختلطة لدهنية ماتناسبك انا مختلطة  لجافة ف مناسبتني الحمدلله تعرفون لمى اغسل وجهي بالغسول واحط التونر وكريم الوجة و كريم محيط العين احس وجهي فريش وصحي في لمعة صحية ونضارة حبيتها من جد بس بصراحة كريم محيط العين مافتح لي الهالات يعني الي بتشتري المجموعة لها حرية الخيار  تستغني عنه او تشترية يمكن انا ماناسبني ويناسب غيري انا بس اتكلم عن تجربتي مانفع معاي مع ان هالاتي مو مرة غامقة بس موجودة ف لو خلصت من عندي بجرب مجموعات ثانية من عندهم لان الصراحة حصل هذا المحل على ثقتي .. وانصحكم فية بقووة 

هذي صورة المجموعة نبداء من اليسار الغسول الجميل فية انو ماينشف الوجة حبيتة 
التونر يعطيك شعور بالانتعاش جممميل والكريم المرطب يرطب لك بشرتك بدون مايخلي اثر دهني ع الوجة انا شخصياً اضفت له قطرات من زين جنين القمح سوو سيرش وبتحصلون معلومات كثير بختصرها لكم ان العلماء الي اكتشفوه سموه ترياق الشباب والفراعنة القدماء يستخدمونه بكثرة ..   الي على شكل مرهم هو المرطب لمحيط العين ومفتح للهالات ماحصلت اي نتيجة منه استبدلته بزبدة بالمرز الي نزلت بوست عنها بالانستجرام لسه باديه فيها ما اقدر احكم بالنسبة لمحيط العين  ومثل ماقلت هذي تجربتي الشخصية الي تبي تفتيح عندهم سيرم تابع للمجموعة مفتح مركز لتفتيح السريع 

شي ثاني عجبني بالمحل مجموعات الشور ريحتها فواحة وثابته نفس العطور الفرنسية اخذت منهم الكروت الي بخت لي عليهم ثبتت بشنطتي ريحتهم حتى نقابي غسلته وباقي فيه  .. بوريكم مجموعة انجنيت عليها اغرمت فيها ااااخ ريحتها بطططلة بس كان عندي مجموعات كثير قلت بخلصهم بعدين اخذها

العطر نفس العطور الفرنسية ريحتة جميلة وتحسين واضحة حبيتها 

بس لاتخلصونها علي الفترة هذي معاقبة على كثرة الطلعات هههههههه
اخاف اذا جاء الافراج ما احصلهاloool 


وبس انتهينا ان شاء الله استفدتوو ..

طريقة اعداد فطيرة زعتر لذيذة ..

مرحبا ..





احسني صايرة قلق اليوم بس ماعليش تحملوني .. بنزل طريقتي في اعداد الفطيرة  ..


( قبل كل شي حبيت اعتذر على الصور بالتدوينة الي راحت وهذي لان الشاحن حق بطارية الكام ضايع 
بس احصلة او اشتري جديد ابشرو بالصور السنعة )

اول شي بقولكم ترى انا من الناس الي تخبص بالطريقة وماتسويها بحذافيرها واحب اضيف من عندي ابداعات 

العجينة عجينة الربع ساعة نقصت من المقادير لشخصين يعني المقادير الي بحطها بتطلع لك صينية صغيرة 

عاد انتي وشطارتك قيسي الكميات الي تكفي العدد الي بتسوين له طبعاً لو بتسوون سيرش لطريقة العجينة
بتحصلونها مرحلتين جربتها وماضبطت هذا شي الشي الثاني كنت صايمة عاشورا ومالي خلق حوسة 
فا جمعت المقادير بمرحلة وحدة اسرع لي .. :)


مقادير العجين & الطريقة :


2 كاس ونص دقيق ابيض ..
كاس ونص ماء دافي ..
نص ملعقة ملح ..
فنجال حق القهوة سكر غير مطحون ..
ملعقة كبيرة خميرة ..
ملعقة صغيرة باكنج باودر 
ثلاث ملاعق كبيرة حليب بودرة 
نص كاس زيت ..


اخلطي المقادير الجافة اول بعدين السائلة اذا حسيتي العجين لينة مررة زي المويا زيدي دقيق شوي 
العجينة لما تطلع معك العجينة كويسة اصلاً بتطلع لينه شوية ماعليك خليها وكملي لك شغلة غسلي المواعين 
حضري لك اي شغلة انا خليتها تقريباً نص ساعة بعدين صبيت العجين بالصينية وطبعاً معروف تدهن قبل بزيت 
هنا عاد سرر الطبخة حقي في اكثر من طريقة ممكن تكون الطبقة الي فوق العجين جبن مالح
 وزيت زيتون وزعتر او  لبنة وزعتر الي يعجبكم انا شخصياً اخلط 

( 3 ملاعق كبيرة زبادي + ملعقتين جبن سايل + 3 ملاعق لبنة + زيت زيتون )

بيطلع معاك طعم اليييييم لذيييييذ التزيين نعناع مجفف زعتر سماق 

دخليها الفرن وبعد ماتخلص خليها تبرد شوي بس غطيها بمنشفة خفيفة اكتشفت ان هذي الطريقة 
ماتخلي الفطيرة او الكيك ينفش او ينخفض من فوق .. جربون ليش لا ؟


هنا خلصنا .. اتمنا تستمتعون بالطعم الذيذ وقولوا لي تجاربكم ع الانستجرام .. 






glamourmyplog



 

أدارة الوقت + المنزل ..

مرحبا ..

 اليوم حبيت اتكلم معاكم عن ادارة الوقت و أدارة المنزل .. 

مارح اقولكم انا ناجحة جداً بهذا الشئ اكيد لا لكن احاول .. حتى الاشخاص البروفاشنيل بهذي الامور 
لابد مايتلخبط نظامهم لان هذا الأمر راجع لشي خارج عن ارادتنا مثلاً تكونين مضبطة جدول معين 
فجاءة يطلع زوجك بدري من الدوام او يتاخر او تجيك طلعه مفاجاءة او زوار او يتعب طفلك.. 
 
مثل هذي الامور تجبرك تغيرين خطتك لازم تكونين متساهله من ناحية كيف يمشي يومك 
احنا بشر مو ساعة ولازم تمشي على خطوات معينة ولا تتغير وبالوقت المحدد ..  انا شخصياً 
اول ماسمعت عن هذا الموضوع قلت بنفسي وووين مع زوجي وبنتي مايمشي ولا يصلح لهم ابد
وبعدين وين متعت الحياة اذا انا بمشي نفسي وبيتي وحياتي على جدول محدد ونظام معين 
صار مقر عسكري مو بيت .. ولكن شفت اني تعبت من الحياة الفوضوية الي انا عايشتها 
مو فوضويه مرة يعني بس بالنسبة لي شي مزعج اني اسهر للفجر وننام ونصحى الظهر ومادري متى نرجع 
ننام واواقات اكلنا مو مثل الناس يعني عاااادي جداً نتغداء الساعة 4 العصر ونتعشاء11 ونص بالليل ..

سبب لي قلق هذا الموضوع .. 

هنا وقفت مع نفسي وقلت لازم احط نظام لكن كيف راح يكون النظام ؟؟

حطيت ف بالي إني مستحيل بمشي عليه مضبووط ونفس الي انا مرتبته 
ولازم يكون في تساهلات ومواعيد مرنه اول يوم واجهت صعوبة 
لان شي جديد علي وثاني يوم على طول تعودت على الوضع وتأقلمت 
معاه الصراحة يابنات احسس ارتحت واحس حصلت لي وقت لنفسي 
اني ارتاح فيه واصفي ذهني واجمع افكاري ولقيت بعد وقت اعتني فيه بنفسي ..
قبل كنت غرقانه  بين المواعين والملابس والمكانس والممسحات 

بنزلكم صورة الجدول اخر التدوينة .. وبشرح لكم إن شاء الله ..

لكن الحين بعطيك اشياء ممكن تفيدك ؟؟ اعتبريها قواعد اساسية او نصائح متبادلة بين ربات البيوت

هذي النصائح موجهه بشكل خاص للعرايس حبيبات قلبي او الامهات الجديدات مو انقاص من احد
ولكن لانك داخلة على حياة جديدة ومرحلة مختلفه طبيعي جداً انك بتتلخبطين وبتضيعين شوي بس ركزي معاي 



1- لاتطلعين من المطبخ وفي ملعقه وصخة نظفي كككل شي لاتخلين شي وراك لان مهما تعبتي وطفشتي 
انتي الخسرانة بتتكدس المواعين عليك .. 

2- خصصي يوم للغسيل و يوم للكوي عشان تحصلين لنفسك وقت وتقللين الجهد ..

3- اكثري من الاستغفار و الحوقله يعني ( لاحول ولا قوة الا بالله ) اولاً الاجر العظيم الي بتحصلينه 
وتقضين وقتك بشي تستفيدين من للأخرتك هذا شي، الشي الثاني بتخلصين بسسرعة ماتوقعتيها..

4- لاتنامين وفي شي طايح  او مو مرتب لان بنهاية بيتكدس ويتكدس ويتكدس وتنعفس الدنيا وبيجيك تعب 
فضضيع وانتي تنظفين ..

5 - مرة او مرتين بالشهر تعاملي مع شغالة تجيك تنفض البيت معك من فوق لتحت 
عشان تساعدك بالاشياء الي تعجزين عنها او ماتقدرينها ومايتراكم عليك ..

6- قد ماتقدرين شغلي البقرة ف بيتك خصصي لها وقت باليوم المهم تشغلينها فيه صدقوني 
بتحسون براحة وسكينة  واطفالكم بيهدون وحتى المشاكل السخيفة الي بتصير بينك وبين زوجك
 تدريجياً بتختفي بتحصلين بركة بالوقت والجهد والرزق وكثيير كثير فوائد لها .. 

7- حطي لك خطة بالطريقة الي تناسبك بترتيب دولاب المطبخ الملابس المنظفات 
عشان يسهل الوصول اليها وبسرعة ويقللك وقت وجهد .. 


من الاشياء الي ساعدتني ب أدارة وقتي وبيتي البورد من جد مفيدة يابنات خاصة 
النوعية الي مثلي لازم كل شي قدامها ولا تنسى .. قبل كنت حاطتها بغرفة الملابس فوق 
طاولة الكوي الحين غيرة مكانها على باب المطبخ .. بوريكم صورتها عاد ماعليكم من شكلها بسوي لها
عملية تجميل بس اصبرو علي احصل فكرة واروق عليها ..

 
 

 صورة اقرب لجدولي والمهام اليوميه الصورة قديمة حق يومين المواعيد مرنه و المتوقع 
قبل كنت اقول مستحيل ينضبط نومنها ومع الجدول 1 ونص سهرانين مرررة قبل كنت اقولكم ماننام الا الفجر 
ياربي لك الحمد والشكر سسسعيدة بالتغيير لو كان بسيط لان الامور الجيدة والايجابية دايم تبداء بالتدريج 

عاد مططو عيونكم خطي صغير وشين اعتذر على هذا الامر .. ممكن جدولي يلهمكم تصممون
 جدول خاص على حسب ظروفكم ويومكم ..


بحط لكم صور لدولاب المعيشة قبل وبعد التنظيم ..

 هذي قبل .. اتذكر ارسلتها لوحدة من صديقاتي قالت هذا حووسة بمسحها من الاستديو لا يشوفها زوجي 
وينقد علي ويقارن هههههههه ..

 
هنا بعد اول ماخلصت صورتة قبل اكنس عشان كذا تجاهلو الحوسة الي تحت .. 


مجررد افكار تلهمك لتغيير للافضل ولراحتك .. هنا انهي التدوينة يارب تعجبكم وتكونون استفدتو منها 

اتمنا يكون في ابداع بالفكر فكرة البورد والجدول مو حكر على ربات البيوت ممكن للموظفة او الطالبة ..

بالتوفيق للجميع .

منتجات جمالية مغرمة فيها ..

نبداء بسم الله ..


اهلين اليوم حابة اعرفكم على منتجاتي العزيزة على قلبي

مدة استخدامي لها : شهر و اكثر ..

اول منتج هوو الحب حقي ..

شامبو كامينوموتو :

يارب يطلع اسمة زي مو مكتوب بالانجليزي ولا اتفشل فيكم 
وترى حسيت اني اركض وانا اكتب اسمة تعبت..  

اول منتج احترت كيف اعبر لكم عنه هو المنقذ لشعري من التساقط .. قبل كان شعري يتساقط 
بكميات مررعبه بشكل اعجز اوصفه حتى اتذكر جبت شغالة تساعدني تقولي انا ما اكنس وسخ
 اكنس شعرك لازم تشوفين حل قبل يجيك صلع عاد انا هنا انهرررت .. بقولكم الاشياء
 الي ساقطة شعري مريت بمرحلة توتر وقلق وتفكير و اخذت مانع حمل و حملة وولدت 
ولمى صار عمر بنتي 6 اشهر زاااد مع اني ما ارضعتها طبيعي كثير وبعد سقطت جنين 
هذولي العوامل الي سببت تساقط شعري ..

هذا الشئ تعرفت عليه من مدونة شوق الله يسعدها وين ماتروح من جد انقذتني .. 

مرة كان زوجي مسافر شغل لدبي ووصيه عليه وجاب لي حبة وحدة سعرها 75 ريال المشكلة صغييير 
انا انقهرت تمنيت جايب كمية لان ما اعرف وين احصله بالرياض بنات تخيلوو بالكثير ثلاث خمس شعرات يطيحون 
مرررة جمممميل ويجننننن اتعب وانا اتكلم عنة رائع بمعنا الكلمة .. 

لو وحدة جربتة ومافاد معاها فمعناته انا مو كذابة او مطيرة المنتج لسماء لا معناته تقبلنا للمنتج مختلفة 

طبعا ً غيرت طريقة اكلي حرصة ع الورقيات واخذت مكمل غذائي اسمة ماترنا  جميل هذا المكمل بس وقفت حالياً 
وبرجع له .. 

ثاني منتج الو ايفا لشعر مع بروتين الحرير انا اخذت لشعر المصبوغ .. 
جميل ترطيبه احط خفيف على شعر بنتي لو بمشطه او بعد الشور لان تعرفون الصغار يتطاير شوي 
احياناً استخدمة مثل الزيت قبل الشور ادهن فيه كامل شعري وما اخليه قريب من الجذور
 ابعدة شوي لان الجذور تمسك بسرعه سوء لون او كريم او زيت فالافضل ماتقربون منها شي ماعداء 
الماسكات او الانمولات او الاشياء الخاصة بالتغذية للفروة .. بنسبة لاطراف شعري حالي مثل حال 
جميع الي يصبغون مقصفة .. استخمتة حسيت خفف الخشونة حقت الاطراف وسهل بالتمشيط والاستشوار ..

سعرة : بالاربعين .. 

اخذته من الصيدلية اتوقع الدواء بس الاكيد بتحصلونه باي صيدلية سبق جربت الانمولات حقتهم الخاصة بالتساقط
قبل زواجي كانت رائعة جداً جداً جداً 

موية ورد الرمحين :
ثالث منتج ..
تتذكرون امهاتنا قبل اي شي يوجعنا او نمرض على طوول تقولك جيبي الفكككس وتحسين انك تعافيتي
وصحصحتي شوي  .. ابداً بالضبط موية الورد نفس المفعول على البشرة << ايش رايكم بالوصف بليغ 

لا من جد موية الورد شي منقذ للبشرة واتوقع الكل يعرف فوائدها الي ماتخلص
من ناحية النضارة التوريد التفتيح الاشراقة الصحية بس الي حابة اتكلم عنه هذا المنتج جداً جميل
 وسهل بالاستخدامشفت كثير بنات يتكلمون انو نازل منه بالعكر الفاسي وانه اجمل واسرع
 نتائج من موية الورد لحالها بدور عليه ولو حصلته وجربته راح اكتب لكم عنه .. 

اخذته من عطار بالقصيم عند اهلي ب  15 ريال اذا مو غلطانه .. 

مزيل مكياج العيون من لوريال :

رابع منتج  في كمية جمااال مو معقولة خطييير واحسه مظلوم جربت كثير منتجات جونسون لانكوم 
منتجات كثيرة مومتذكرتها بالضبط ولاكن هذا تغلب عليها اهم نقطة عندي والي حبيته بسببة انو اذا بشيل المسكرة 
ما احصل رموشي بالقطنة او على خدي او طاحت داخل عيني .. الحين تستخدمة وحدة وتقول طيح رموشي 
حبيبتي انتي ماما كلن وطريقتة اذا انتي من نوعية وحدة اعرفها اسمها منال اختي اذا جت تمسح المكياج
 تجيني صدمة عاطفيه تفررررك قوووة من قلب لا غلط اكيد بتطيح رموشك وتتنتف بعد وبعدين حرام 
تجيبين لنفسك تجاعيد مبكرة اول شي رجي العلبة بعدين حطي المنتج بالقطن بكمية مناسبة ..
خلي القطن شوية على الرموش حركي خفيف كنك تذوبين المسكرة وامسحي  كرري الحركة
 بتحصلين المسكرة راحت بدون ماتفقدين رموشك .. المزيل عموماً رائع لازالة المكياج 
بس مهم تنظفين وجهك كوويس ماتكتفين فيه بس ..

 اخذته من بندة سعره شي و ثلاثين ..

مسك الجسم من الماجد: خامس منتج  هذا ثاني مرة اخذه منهم من ارووع الاشياء الي استخدمتها كا سبريه للجسم
احسني بقمة الكشخه اذا تعطرت منه في ناس اذا شمو ريحتة معي يعجبهم في ناس لا يحسونه قوي ومزعج
الناس اذواق ثااابت و فواح مستحيل استخدمة لو بطلع من البيت .. اذا بروح ل احد اخذه معاي ارش منه على رقبتي
وعلى الرسغ حق اليد يعني بداية الذراع من عند الكف يارب فهمتو لي  احط خفيف لانه قوي مرة او ارش من بعيد 
عشان ما ياخذ الجوو على العطر الي بحطه ..

سعرة : 100 ريال عاد ما ادري لو زادو سعرة ..





هنا كواليس التصوير ...

وبكذا انهينا تدوينة اليوم يارب اكون افدتكم ..

تدوينة تعريفية ..

نبداء ..


 (بسم الله الرحمن الرحيم )



مرحبا.. الصراحة مو محضرة كلام محدد بس حبيت تعرفون انتم مع مين تتعاملون

اسمي وفاء .. أم و زوجة وبعض الناس ينادوني أم البندري
عاد هنا اخذ وضعية يسرا ب مسلسل سرايا عابدين مع الفستان والتاج احسني كشخة هههههههه

 المهم ماعلينا من المقدمة الي تفشل بس مو ماسحتها لان عندي قناعة ان كل مانكبر ونتطور ونرجع للماضي نلقاه يفشل لو حاولنا بذيك اللحظة نطلع اكشخ ماعندنا .. ليش حابة تعرفون عني ؟؟

لان ناوية باذن الله افيدكم انا احب افيييييد وعندي كمية من المعلومات بمجالات مختلفة ماني حابة احتفظ فيها لنفسي فقط صحيح اني افيد خواتي و زوجات اخواني وبنات عمي واهل زوجي بس ما احس اني شبعة من اني اكون شخص مفيد وفعال بالمجتمع انا احب اعطي وما احب نظااااام سررر لاتعلمون ليش ليش انتي بتشترينه لهم من فلوسك ولا بتروحين معاهم البيت كل يوم تدهنينهم بالخلطة السرية حقتك احب اني احسب ل نفسي الفايدة الي انا اعطيها لشخص كا اجرر ومثوبة من ربي ان شاء الله .. صحيح في اشخاص كلامهم يخوف ويضايق مثل يوووة منك مافي شي ماتعرفينه اكثر كلمة تضايقني ليش ماتبحثين وتقرين وتطورين نفسك وتشتغلين على نفسك الشغلة جدا بسيطة واحس الحين مافي احد جاهل النت فتح عيونا على كل شي نجهلة ومع ذلك يجيك اشخاص يصدمونك انهم مايعرفون شي و ماعندهم اي نية لتقدم والتطور وانهم يتعبون نفسهم بالبحث عن معلومات يبغون يجلسون والمعلومة تجيهم لحد عندهم وتقولهم لو سمحتو اعرفوو وتعلم وتدخل عقلهم وتتربع مع عش العنكبوت ... << كاننا قلبنا السالفة حش حريم ههههههههه


انا حابة اكون معاكم مثل ما انا ولا عندي نيه اغير من طبعي عشان اجذب فئة معينة يعني ما اصير الثقيلة الرزة المليغة والرسمية والي بملي عليكم المعلومه وانتم بكيفكم فهمتو ولالا .. ولا ابي اكون معاكم الشخصية الساذجة الي بالغصب بتكون فكاهية ويالله اضحكوو غصب .. ابغى اكون معاكم مثل ما انا .. وفاء فقط لا غير .

من هنا بوضح لكم..

 اقسام المدونة :  

1- أسرتي ..
2- منزلي.. 
3- جمالي ..
4- ابداعاتي ..  


هنا ننهي التدوينة التعرفية اتمنا نقضي مع بعض اوقات مفيدة وسعيدة مع بعض ان شاء الله تكون البلوج 

شاهد لي لا علي ويجمعنا بجناته يوم يبعث عبادة ..