أدارة الوقت + المنزل ..

مرحبا ..

 اليوم حبيت اتكلم معاكم عن ادارة الوقت و أدارة المنزل .. 

مارح اقولكم انا ناجحة جداً بهذا الشئ اكيد لا لكن احاول .. حتى الاشخاص البروفاشنيل بهذي الامور 
لابد مايتلخبط نظامهم لان هذا الأمر راجع لشي خارج عن ارادتنا مثلاً تكونين مضبطة جدول معين 
فجاءة يطلع زوجك بدري من الدوام او يتاخر او تجيك طلعه مفاجاءة او زوار او يتعب طفلك.. 
 
مثل هذي الامور تجبرك تغيرين خطتك لازم تكونين متساهله من ناحية كيف يمشي يومك 
احنا بشر مو ساعة ولازم تمشي على خطوات معينة ولا تتغير وبالوقت المحدد ..  انا شخصياً 
اول ماسمعت عن هذا الموضوع قلت بنفسي وووين مع زوجي وبنتي مايمشي ولا يصلح لهم ابد
وبعدين وين متعت الحياة اذا انا بمشي نفسي وبيتي وحياتي على جدول محدد ونظام معين 
صار مقر عسكري مو بيت .. ولكن شفت اني تعبت من الحياة الفوضوية الي انا عايشتها 
مو فوضويه مرة يعني بس بالنسبة لي شي مزعج اني اسهر للفجر وننام ونصحى الظهر ومادري متى نرجع 
ننام واواقات اكلنا مو مثل الناس يعني عاااادي جداً نتغداء الساعة 4 العصر ونتعشاء11 ونص بالليل ..

سبب لي قلق هذا الموضوع .. 

هنا وقفت مع نفسي وقلت لازم احط نظام لكن كيف راح يكون النظام ؟؟

حطيت ف بالي إني مستحيل بمشي عليه مضبووط ونفس الي انا مرتبته 
ولازم يكون في تساهلات ومواعيد مرنه اول يوم واجهت صعوبة 
لان شي جديد علي وثاني يوم على طول تعودت على الوضع وتأقلمت 
معاه الصراحة يابنات احسس ارتحت واحس حصلت لي وقت لنفسي 
اني ارتاح فيه واصفي ذهني واجمع افكاري ولقيت بعد وقت اعتني فيه بنفسي ..
قبل كنت غرقانه  بين المواعين والملابس والمكانس والممسحات 

بنزلكم صورة الجدول اخر التدوينة .. وبشرح لكم إن شاء الله ..

لكن الحين بعطيك اشياء ممكن تفيدك ؟؟ اعتبريها قواعد اساسية او نصائح متبادلة بين ربات البيوت

هذي النصائح موجهه بشكل خاص للعرايس حبيبات قلبي او الامهات الجديدات مو انقاص من احد
ولكن لانك داخلة على حياة جديدة ومرحلة مختلفه طبيعي جداً انك بتتلخبطين وبتضيعين شوي بس ركزي معاي 



1- لاتطلعين من المطبخ وفي ملعقه وصخة نظفي كككل شي لاتخلين شي وراك لان مهما تعبتي وطفشتي 
انتي الخسرانة بتتكدس المواعين عليك .. 

2- خصصي يوم للغسيل و يوم للكوي عشان تحصلين لنفسك وقت وتقللين الجهد ..

3- اكثري من الاستغفار و الحوقله يعني ( لاحول ولا قوة الا بالله ) اولاً الاجر العظيم الي بتحصلينه 
وتقضين وقتك بشي تستفيدين من للأخرتك هذا شي، الشي الثاني بتخلصين بسسرعة ماتوقعتيها..

4- لاتنامين وفي شي طايح  او مو مرتب لان بنهاية بيتكدس ويتكدس ويتكدس وتنعفس الدنيا وبيجيك تعب 
فضضيع وانتي تنظفين ..

5 - مرة او مرتين بالشهر تعاملي مع شغالة تجيك تنفض البيت معك من فوق لتحت 
عشان تساعدك بالاشياء الي تعجزين عنها او ماتقدرينها ومايتراكم عليك ..

6- قد ماتقدرين شغلي البقرة ف بيتك خصصي لها وقت باليوم المهم تشغلينها فيه صدقوني 
بتحسون براحة وسكينة  واطفالكم بيهدون وحتى المشاكل السخيفة الي بتصير بينك وبين زوجك
 تدريجياً بتختفي بتحصلين بركة بالوقت والجهد والرزق وكثيير كثير فوائد لها .. 

7- حطي لك خطة بالطريقة الي تناسبك بترتيب دولاب المطبخ الملابس المنظفات 
عشان يسهل الوصول اليها وبسرعة ويقللك وقت وجهد .. 


من الاشياء الي ساعدتني ب أدارة وقتي وبيتي البورد من جد مفيدة يابنات خاصة 
النوعية الي مثلي لازم كل شي قدامها ولا تنسى .. قبل كنت حاطتها بغرفة الملابس فوق 
طاولة الكوي الحين غيرة مكانها على باب المطبخ .. بوريكم صورتها عاد ماعليكم من شكلها بسوي لها
عملية تجميل بس اصبرو علي احصل فكرة واروق عليها ..

 
 

 صورة اقرب لجدولي والمهام اليوميه الصورة قديمة حق يومين المواعيد مرنه و المتوقع 
قبل كنت اقول مستحيل ينضبط نومنها ومع الجدول 1 ونص سهرانين مرررة قبل كنت اقولكم ماننام الا الفجر 
ياربي لك الحمد والشكر سسسعيدة بالتغيير لو كان بسيط لان الامور الجيدة والايجابية دايم تبداء بالتدريج 

عاد مططو عيونكم خطي صغير وشين اعتذر على هذا الامر .. ممكن جدولي يلهمكم تصممون
 جدول خاص على حسب ظروفكم ويومكم ..


بحط لكم صور لدولاب المعيشة قبل وبعد التنظيم ..

 هذي قبل .. اتذكر ارسلتها لوحدة من صديقاتي قالت هذا حووسة بمسحها من الاستديو لا يشوفها زوجي 
وينقد علي ويقارن هههههههه ..

 
هنا بعد اول ماخلصت صورتة قبل اكنس عشان كذا تجاهلو الحوسة الي تحت .. 


مجررد افكار تلهمك لتغيير للافضل ولراحتك .. هنا انهي التدوينة يارب تعجبكم وتكونون استفدتو منها 

اتمنا يكون في ابداع بالفكر فكرة البورد والجدول مو حكر على ربات البيوت ممكن للموظفة او الطالبة ..

بالتوفيق للجميع .